Roindukodi.
Mi sih kuuluu?
Suuri kodi, äijjy meidy,
Välly piha.
Järvi čoma, levei randu,
Kebjei veneh, luja lauttu.
Syvä kaivo, pitky peudo.
Loitton tagan suo da meččy.

Roindurannau nygöi on
Yksinäine kodi harmai,
Harmai hieru, harmai taivaz.
Järvi oma,
Veneh rannau lahonnuh.
Pihua eule,
Ihan rinnau meččy mustu.
Kondied toiči gostih kävväh,
Harmai hukku puaksuh uuvou.
Vaigu suo on endiželleh.

Huondez tuli. Päivy nouzi.
Kullal koivud läpetetäh.
Kova tuuli vasturandu
Järvie äijjäy läikyttelöy.
Harakkaine harmaibokku
Meijän pihal hačattau.
”Sinun iäney, harakkaine,
Käymäh kezäy uvvessah
Meidy, vahnoi, kodi vuottau,
Hyviä matkua toivottau.”
Nuorii hieruh suaja pidäz
Linnan jytyi elämäh.
Ven’a hieruu vägey ainoz
Oli jäygivuozissah.

Oliz himo tauveu tulla,
Suksed jaugah, meččäh hiihtiä,
Eigo lindu eräz lendäz.
Muidu eule hieruz meijän.
Uuvou jäygie lumeh jättäi,
Lähtie aig´on meil´gi iärez.